647 viktima gjatë muajit shtator në Maqedoninë e Veriut

KEYSTONE/EPA/GEORGI LICOVSKI

Në Maqedoninë e Veriut, numri i vdekjeve si pasojë e komplikimeve nga COVID-19 vazhdon të jetë i lartë dhe shqetësues. Sipas të dhënave zyrtare të MSH-së, nga 01 deri më 29 Shtator janë shënuar 647 viktima. Numri më i lartë ditor u shënua më 18 Shtator, me 41 viktima.

Nga 22 Shtatori autoritetet e shëndetësisë njoftojnë edhe për raste të vdekjeve me diagnozë të COVID-19 që vijnë përmes sistemit “Termini Im”. Numri i tyre arrin në 46 viktima, me datë të ndryshme të vdekjeve. Nga MSH-ja kanë thënë se përqindje e lartë e viktimave janë të pavaksinuar.

Autoritetet e shëndetësisë në Maqedoninë e Veriut, në analizat javore njoftojnë se për 36% janë ulur infektimet e reja me COVID-19.

Sipas Institutit për Shëndet Publik, nga mbi 13 mijë rastet e pacientëve të hospitalizuar, 47.14% prej tyre kanë përfunduar me vdekje kurse 52.86% janë shëruar. Për momentin të shtruar në spitale janë mbi 770 pacientë.

Ditëve të fundit ka rënë interesimi për vaksinim. Nga MSH-ja njoftojnë se brenda një dite, dje janë aplikuar  3.014 vaksina.

Deri më 29 Shtator të rivaksinuar janë 726.625, kurse dozën e tretë e kanë marrë 181 qytetarë.

Me shifrat e fundit, sipas MSH-së, 52% e qytetarëve mbi 40 vjeç kanë marrë dy doza të vaksinave, kurse 32% e grupmoshës 18-39 kanë marrë të paktën një dozë të vaksinave.