Administrata e presidentit amerikan Donald Trump është në fazën përfundimtare të hartimit të një rregulloreje që parasheh rimbursimin e mjekëve për shërbimet e ofruara ndaj pacientëve që raportojnë efekte të padëshiruara pas vaksinimit.
Sipas këtij propozimi, pagesat do të përfshijnë diagnostikimin, trajtimin dhe këshillimin e personave që pretendojnë se kanë përjetuar pasoja shëndetësore pas marrjes së vaksinave.
Nisma ka nxitur shqetësime te ekspertët e shëndetësisë, të cilët vlerësojnë se një politikë e tillë mund të ndikojë në besimin e publikut ndaj vaksinimit dhe të krijojë një bazë të re të të dhënave për rreziqet e mundshme që lidhen me vaksinat.
Ndërkohë, sekretari amerikan i Shëndetësisë dhe Shërbimeve Njerëzore, Robert F. Kennedy Jr., ka bërë të ditur edhe krijimin e një qendre të posaçme kërkimore për dëmtimet e pretenduara nga vaksinat, në kuadër të Institutit Kombëtar të Shëndetësisë. Ai gjithashtu ka ndërmarrë hapa për rishikimin e Programit të Kompensimit për Dëmtimet nga Vaksinat (VICP).
Ky program është themeluar në vitin 1986, me qëllim që personat që pësojnë efekte të padëshiruara nga vaksinimi të mund të përfitojnë kompensim përmes një procedure të përshpejtuar.
Dorit Reiss, profesoreshë e drejtësisë në Universitetin e Kalifornisë në San Francisko, ka paralajmëruar se dobësimi i këtij mekanizmi mund të ketë pasoja konkrete për personat e prekur.
Ajo thekson se efektet e rënda shëndetësore pas vaksinimit janë të rralla, por kur ndodhin, personat e prekur duhet të kenë mundësi të marrin kompensimin e merituar.
