70 mijë bashkatdhetarë, vetëm gjatë vikendit, hynë në Kosovë

Fluks i madh i mërgimtarëve është vërejtur edhe gjatë dy ditëve të vikendit në të gjitha pikëkalimet kufitare në Kosovë, e po ashtu edhe përmes Aeroporti Ndërkombëtar “Adem Jashari”, përcjell albinfo.ch.

Referuar statistikave nga ana e Policisë së Kosovës, gjatë dy ditëve të vikendit, më 19 dhe 20 dhjetor 2020, në territorin e Kosovës nga pikat kufitare dhe aeroporti kanë hyrë 70 mijë qytetarë.

Të shtunën, më 19 dhjetor, në territorin e Kosovës përmes pikave kufitare kanë hyrë 26 mijë e 583 persona, ndërsa të dielën, më 20 dhjetor, kanë hyrë 30 mijë e 72 persona, e që në total i bie 55 mijë 655 persona vetëm pikave kufitare, pa llogaritur mërgimtarët që kanë ardhur me aeroplanë, shkruan telegrafi.

Në bazë këtyre statistikave në territorin e Kosovës gjatë vikendit hynë 22 mijë e 143 vetura dhe 459 autobusë.

Duhet theksuar se qytetarët tanë nga diaspora, të cilët kanë marrë rrugën për Kosovë, për të kaluar pushimet, nuk kanë nevojë t’i nënshtrohen testit PCR, ndërsa përjashtim bëjnë vetëm ata që nuk kanë vendbanim në Kosovë dhe të cilët vijnë nga vendet e klasifikuara me “rrezik të lartë”, sipas klasifikimit që bën Qendra Evropiane për Parandalimin dhe Kontrollin e Sëmundjes (ECDC). /Albinfo.ch