9 muaj burg për shqiptarin, trafikues refugjatësh në Gjermani

Gjatë disa viteve të fundit kishte kontrabanduar refugjatë sirianë dhe afganë duke i sjellë nga Greqia në Gjermani me dokumente të falsifikuara

Gjykata në Erding ka dënuar javën që shkoi një shtetas 26 vjeç t të Shqipërisë me 9 muaj burg për kontrabandim të njerëzve.

Pjesëtarët e Policisë Federale në Aeroportin e Mynihut  e kishin fajësuar të riun se gjatë viteve të fundit kishte kontrabanduar në shumë raste refugjatë sirianë dhe afganë duke i sjellë nga Greqia në Gjermani me dokumente të falsifikuara.

Ai, si pjesëtar i një organizate trafikuesish, i ka ofruar në dispozicion edhe të dhënat e tij personale për të trafikuarit. Këta pastaj me leje njoftimi rumune të falsifikuara, me të dhëna të shqiptarit, kishin udhëtuar për në Gjermani. Këtu, hetuesve të Policisë Federale u kishte rënë në sy se paraqiteshin vazhdimisht të huaj me dokumente të falsifikuara që kishin emrin e njëjtë, atë të shqiptarit 26 vjeçar.

Në marsin e këtij viti, kur ai kishte fluturuar vetë nga Greqia në Munih për të vizituar familjarët, u kishte rënë në kurth policëve. Me rastin e kontrollimit që i kishin bërë atyre u ishte aktivizuar sistemi ku ishte regjistruar emri i tij në dokumentet e të trafikuarve.

Pas rishikimit të lejes shqiptare të njoftimit, policët kishin konstatuar se ajo ishte e lëshuar në mënyrë të rregullt. Ata kishin ardhur në përfundimin se para vetes kishin një pjesëtar të bandave të trafikantëve me njerëz, gjë që edhe ai e kishte pranuar gjatë marrjes në pyetje.

Ai ka thënë se për shërbimet e tij kishte marrë nga shefi i bandës nga 50 euro për secilin refugjat, që sipas tij gjithsej bëhej fjalë për një fitim prej 700 deri 800 eurosh.

Sidoqoftë, i akuzuari ka kaluar gjashtë muaj në burgun hetues para se të gjykohej, javën e kaluar nga Gjykata në Erding. Dënimi i shqiptuar: Nëntë muaj burg për trafikim të organizuar të të jhuajve, me kusht për tri vite.