94 për qind më pak kërkesa azili nga Kosova

Autoritetet gjermane në fillim të shkurtit regjistronin deri nga 1500 azilkërkues nga Kosova në ditë, në muajin prill ky numër ka rënë në më pak se 100 persona në ditë

Numri i azilkërkuesve nga Kosova po shënon rënie të theksuar. „Njerëzit e kanë kuptuar se sistemi gjerman i azilit nuk është zgjidhje për gjendjen e tyre të rëndë ekonomike në Kosovë“ ka thënë për gazetën „Rheinische Post“ kryetari i Zyrës Federale për Migracion dhe Refugjatë, Manfred Schmidt.

Pasi që autoritetet gjermane në fillim të shkurtit regjistronin deri nga 1500 azilkërkues nga Kosova në ditë, në muajin prill ky numër ka rënë në më pak se 100 persona në ditë. Kjo nënkupton një ulje prej 94 për qind të numrit nga shkurti në prill.

„Fakti se tashmë vetëm pak njerëz vijnë në Gjermani nga Kosova për të kërkuar azil pa pasur shans për sukses, tregon se përpunimi me përqëndrim të shtuar i kërkesave të kosovarëve për azil dhe masat e ndërmarra të informimit në vendin e prejardhjes, kanë dhënë rezultat“, ka thënë Schmidt.

Rënia e madhe e numrave ka filluar që në muajin mars, kur mesatarisht janë paraqitur për azil nga 150 kosovarë në ditë, njofton Zyra për Migracion dhe transmeton albinfo.ch. Ndërkaq në mars janë regjistruar gjithsej 32054 kërkesa azili, prej të cilave më së shumti nga Kosova, gjegjësisht 11729 sosh. Por sipas zyrës së përmendur, në këtë numër janë llogaritur edhe shumë kërkesa të ardhura gjatë janarit dhe shkurtit që nuk janë pranuar për përpunim në kohën kur janë paraqitur.