Ndërtimtarët, edhe më tutje në pension me 60 vjet

Janë kurorëzuar me sukses negociatat në mes të sindikatave Unia dhe Syna nga njëra anë dhe Bashkësia e Punëdhënësve në ndërtimtari nga ana tjetër. Si rezultat është arritur që të mos rrezikohet pensionimi në moshën 60 vjeçare në këtë degë të ekonomisë. Pensionimi në këtë moshë ka qenë një e arritur e sindikatave, e realizuar para më shumë se dhjetë vitesh, e cila po rrezikohej nga presioni i punëdhënësve.

Lidhur me pranimin ose jo të marrëveshjes së arritur nga dy delegacionet do të vendosë konferenca profesionale e Unia-s të shtunën që vjen. Por, kjo do të realizohet falë ngritjes prej 2 për qind të kontributit që ndahet: 1.5% nga punëdhënësit dhe 0.5% nga punëtorët.

Përveç kësaj, sindikatat dhe punëdhënësit janë marrë vesh edhe për nënshkrimin e marrëveshjes kolektive në nivel vendi lidhur me degën e ndërtimtarisë. Marrëveshja hyn në fuqi më 1 janar 2016 dhe vlen deri në fund të vitit 2018. Marrëveshja, ndalon, veç tjerash pagesën e të ardhurave «me para në dorë» (cash). Nga viti 2017 do të rritet kompensimi i drekës nga 15 në 16 franga.