Në kantonin e Ticinos në Zvicër, mjekët e pensionuar po u ofrojnë qytetarëve këshilla dhe informacione shëndetësore falas përmes nismës “Café Med”.
Shërbimi, i themeluar nga Akademia “Menschenmedizin” me seli në Cyrih, funksionon në Lugano dhe Bellinzona, ku qytetarët mund të diskutojnë me profesionistë me përvojë për shqetësimet dhe paqartësitë që kanë lidhur me shëndetin.
Sipas koordinatores së “Café Med Ticino”, mjekes Antonella Richetti, në takime marrin pjesë mesatarisht katër deri në shtatë persona, ndërsa gjatë vitit numri i qytetarëve që përfitojnë nga ky shërbim arrin në rreth 100.
Shumica e tyre janë të moshuar, të cilët kërkojnë sqarime për terapitë, efektet anësore të barnave dhe trajtimet e rekomanduara. Megjithatë, një nga nevojat kryesore të pacientëve është edhe të dëgjohen dhe të kenë më shumë kohë për të diskutuar me profesionistët shëndetësorë.
Në nismë janë angazhuar rreth 15 mjekë dhe profesionistë nga fusha të ndryshme, përfshirë kardiologjinë, onkologjinë, mjekësinë familjare, psikologjinë dhe psikiatrinë.
“Café Med” nuk ofron diagnostikim, receta apo mendime të dyta mjekësore, por synon të ndihmojë qytetarët të kuptojnë më mirë informacionet shëndetësore dhe të marrin vendime të informuara. Një tjetër synim është edhe parandalimi i përdorimit të panevojshëm të barnave.
Pavarësisht interesimit në rritje dhe kërkesave për zgjerimin e shërbimit në zona të tjera, kapacitetet mbeten të kufizuara, pasi mjekët angazhohen vullnetarisht/albinfo.ch/