2015, vit rekord për numrin e lindjeve në Zvicër

Në grupin e spitaleve të Bernës (Inselspital) ka pasur një ngritje prej 14 për qind të numrit të lindjeve në krahasim me vitin paraprak, i cili edhe ashtu ishte vit rekord deri atëherë

Viti që lamë pas ka qenë vit rekord në Zvicër jo vetëm për nga ditët me diell dhe temeperaturat e larta. Edhe numri i lindjeve të regjistruara në spitalet zvicerane gjatë vitit 2015 e bën këtë vit të dallohet nga vitet tjera.

Në shumë nga spitalet e lindjes janë regjistruar numra rekordë të foshnjave të ardhura në jetë. Kështu ka qenë në Inselspital të Bernës, në Spitalin Universitar të Gjenevës (ku janë regjistruar 4142 lindje) në atë të Bazelit, të Thunit etj. Sa i përket spitalit të përmendur të Bazelit, aty gjatë vitit të kaluar kanë parë dritën 2519 fshnja ose më së shumti në 43 vitet e fundit.

Në grupin e spitaleve të Bernës (Inselspital) ka pasur një ngritje prej 14 për qind të numrit të lindjeve në krahasim me vitin paraprak, i cili edhe ashtu ishte vit rekord deri atëherë. Janë shënuar pra 2313 lindje brenda vitit. Edhe sa u përket binjakëve dhe trenjakëve, vit 2015 përbën rekord. Në spitalet e përmendura të Bernës janë realizuar 118 lindje binjakësh dhe 11 trenjakësh.

Ndërsa nga spitalet si ai i Solothurnit apo i Oltenit bëhet e ditur se numri i lindjeve është më i madhi nga viti 2006.

Emrat me të cilët i kanë pagëzuar prindërit më së shpeshti fëmijët e tyre kanë qenë: Elena, Mia, Anna dhe Sophie püer vajzat ndërsa Liam, Ben dhe Dario për djemtë.

Mosha mesatare e nëave që kanë lindur fëmijë gjatë vitit 2015 ka qenë, sikur dhe më parë, rreth të tridhjetave.