Investimet më të mëdha vijnë nga diaspora në blerjen e banesave

Vitin e kaluar Kosova nuk ka pasur asnjë investim të jashtëm që do të mund të sillte punësim. Kështu të paktën flasin të dhënat e strukturës së investimeve. Nga 305.2 milionë që thuhet të jenë investuar në periudhën janar-tetor, pjesa dërmuese është në blerjen e patundshmërive nga mërgimtarët, raporton KTV, përcjell albinfo.ch.

Në konferencën e së martës kryeministri i Kosovës, Isa Mustafa, tha se investimet po rrezikohen për shkak të situatës politike, konkretisht protestës së opozitës.

Por, sa në të vërtetë kanë qenë investitorët e huaj të interesuar për tregun kosovar një vit më parë? Në përgjigjen dhënë KTV-së nga Agjencia për Investime dhe përkrahjen e ndërmarrjeve në Kosovë, nga janari deri në tetor të vitit të kaluar ka pasur investime të jashtme, vlera e të cilave ka arritur në 305.2 milionë euro.

Por, struktura e këtyre investimeve flet se pjesa dërmuese e këtyre milionëve janë investuar në blerje të banesave nga mërgimtarët tanë në Zvicër.

Nga 305 milionë, vetëm 8.5 milionë euro janë investuar në industri.