Këshilli Federal i Zvicrës synon të ashpërsojë rregullimin e cigareve elektronike, duke propozuar që ato t’i nënshtrohen taksës për parandalimin e duhanpirjes, e cila aktualisht aplikohet për cigaret tradicionale. Propozimi është pjesë e një plani më të gjerë të qeverisë për parandalimin e varësive.
Që nga viti 2024, cigaret elektronike i nënshtrohen vetëm taksës federale mbi duhanin, por nuk kontribuojnë në Fondin për Parandalimin e Duhanit.
Në një raport të miratuar të mërkurën, Këshilli Federal rekomandon që kjo taksë të shtrihet edhe te produktet elektronike të nikotinës.
Sipas qeverisë zvicerane, zëvendësimi gradual i cigareve tradicionale me produkte të reja të nikotinës, të cilat nuk i nënshtrohen taksës për parandalim, po zvogëlon burimet financiare të këtij fondi.
Qeveria thekson se edhe këto produkte paraqesin rreziqe për shëndetin dhe mund të shkaktojnë varësi, veçanërisht pasi një pjesë e konsiderueshme e tyre synon konsumatorët e rinj.
Propozimi gjen mbështetje politike, por ngre edhe rezerva
Nisma e Këshillit Federal është mirëpritur përgjithësisht në skenën politike zvicerane, megjithëse nga e djathta janë shprehur disa rezerva.
Këshilltarja shtetërore nga Partia Liberale (FDP), Johanna Gapany, ka theksuar se taksimi duhet të jetë i orientuar drejt produkteve që përmbajnë nikotinë, pa penalizuar personat që përdorin cigaret elektronike si një mënyrë kalimtare për ta lënë duhanin.
Ndërkaq, përfaqësuesit e së majtës vlerësojnë se edhe cigaret elektronike duhet të kontribuojnë në financimin e masave parandaluese.
Deputeti socialist në Këshillin e Shteteve, Baptiste Hurni, ka deklaruar se është e arsyeshme që këto produkte të kontribuojnë në fondin për parandalim, pasi paraqesin rrezik të varësisë.
Edhe organizatat që merren me parandalimin e varësive e kanë mirëpritur propozimin. Organizata Addiction Switzerland vlerëson se kjo masë do të forcojë përpjekjet parandaluese, duke pasur parasysh se cigaret elektronike konsumohen kryesisht nga të rinjtë.
Megjithatë, organizata thekson se çmimet e këtyre produkteve në Zvicër mbeten dukshëm më të ulëta krahasuar me vendet e tjera evropiane, ndonëse rritja e çmimeve konsiderohet një nga mënyrat më efektive për të parandaluar fillimin e konsumimit.
Fondi për parandalimin e duhanit ka rreth 12 milionë franga në vit
Aktualisht, Fondi për Parandalimin e Duhanit ka në dispozicion rreth 12 milionë franga zvicerane në vit për financimin e masave parandaluese. Fondi financohet përmes një takse prej 2.6 centimash për çdo paketë të cigareve tradicionale.
Këshilli Federal propozon që ndryshimi të përfshihet në kuadër të rishikimit të ardhshëm të Ligjit për Taksën e Duhanit. Ende nuk është përcaktuar një afat kohor për zbatimin e tij.
Kjo masë është pjesë e një sërë rekomandimesh të qeverisë zvicerane që synojnë forcimin e politikave për parandalimin e varësive.