Krasniqi: S’ka qeveri para 17 shkurtit

Duke komentuar pohimet për postin e presidentit, Krasniqi ka thënë se do të respektojë vendimin e partisë së tij rreth kësaj çështje

Kanë dalë në shesh dallimet brenda PDK-së. Përderisa kreu i kësaj partie, Hashim Thaçi dhe përfaqësues të bashkësisë ndërkombëtare, pohonin se para 17 shkurtit – trevjetorit të shpalljes së pavarësisë, do të formohet qeveria e re, sekretari I përgjithshëm I PDK-së, Jakup Krasniqi, njëherësh ushtrues i detyrës së presidentit, ka caktuar më 24 shkurt konstituimin e Kuvendit.

Në mbledhjen e sotme të Kryesisë së mëparshme të Kuvendit me përfaqësuesit e partive parlamentare, Krasniqi ka dal me qëndrim që për shkak të rrethanave politike në Kosovë, është e pamundur që institucionet e vendit të krijohen para 17 shkurtit. Krasniqi, megjithatë, ka thënë se institucionet do të konstituohen brenda afatit kushtetues – brenda shkurtit.

Ndërsa, duke komentuar pohimet për postin e presidentit, Krasniqi ka thënë se do të respektojë vendimin e partisë së tij rreth kësaj çështje.

Zhvillimet e sotme vijnë pas shkrimeve të mediave se ka dallime brenda PDK-së lidhur me një takim të kreut të kësaj partie Hashim Thaçi me kreun e AKR-së, Behgjet Pacolli, ku parashihej që ky i fundit të zgjidhet president. Sipas mediave, dhjetë deputetë të PDK-së nuk do ta votonin Pacollin për president, ngase parapëlqejnë që Krasniqi të mbajë postin e presidentit.