Zvicra mbështet 10 shkolla profesionale në Kosovë

Shuma e përgjithshme e granteve arrin vlerën 100 mijë euro, nga të cilat përfitojnë 10 shkolla në tetë komuna

Qeveria zvicerane vazhdon të mbështesë zhvillimin e arsimit në Kosovë. Të enjten në lokalet e Ministrisë së Arsimit Shkencës dhe Teknologjisë në Prishtinë është nënshkruar edhe një marrëveshjeve për grantet shkollore, të parapara për t’u ndarë nga qeveria zvicerane, si mbështetje për shkollat partnere të projektit VES (Mbështetja e arsimit profesional dhe trajnimit).

Pas nënshkrimit të kësaj marrëveshje këshilltari politik në MASHT, Ragip Gjoshi tha se deri më tani Zvicra ka dhënë mbi 10 milionë franga në fushën e arsimit dhe se implementimi i marrëveshjes së nënshkruar do të jetë shtysë e fortë për ngritjen e cilësisë në arsim.

Kurse zv.drejtori i Zyrës zvicerane për bashkëpunim dhe zhvillim “Swiss Contact”, Guido Beltran tha se punëtoritë e shkollave profesionale të cilat janë ndërtuar kohë më parë dhe të cilat po ndihmohen edhe tani do të ngrejnë cilësinë në arsim.

Këto grante i kanë përfituar disa shkolla të mesme profesionale nga e tërë Kosova, me ç`rast është bërë edhe nënshkrimi i marrëveshjes me drejtorët e këtyre shkollave dhe me drejtorët e drejtorive komunale të Arsimit.

Shuma e përgjithshme e granteve për të cilat u nënshkrua sot marrëveshja arrin vlerën 100 mijë euro, nga të cilat përfitojnë 10 shkolla në tetë komuna.