Sot rrogat me rritje, FMN konteston

Edhe përkundër sugjerimeve të Fondit Monetar Ndërkombëtar (FMN) që të mos ketë rritje të rrogave në sektorin publik, prej nesër rrogat do të dalin me rritjet e paralajmëruara nga Qeveria.

Nesër pritet që mësimdhënësit parauniversitarë, policët, shërbyesit civile, zyrtarët doganorë, punëtorët shëndetësorë dhe zjarrfikësit t’i marrin rrogat me rritje deri në 50 për qind.

Ministri i Financave, Bedri Hamza ka konfirmuar se kjo ministri i ka bërë të gjitha përgatitjet që nga sot të filloi ekzekutimi i të gjitha llojeve të pagesave nga buxheti i Kosovës, pasi javën e kaluar është miratuar buxheti nga Kuvendi.

“Ministria e Financave i ka bërë të gjitha përgatitjet e mundshme. Besoj se rrogat me rritje për punëtorët e sektorit publik, do të lëshohen nga dita e martë”, ka thënë Hamza.Por, përfaqësuesi i FMN-së në Kosovë, Hose Suleman sot përsëriti se Qeveria mund t’i rrisë rrogat nëse ka më shumë prodhim, nëse ka një shkallë më të lartë të rritjes ekonomike, ose nëse ka rritje të produktivitetit.

“Le ta zëmë që inflacioni është shtatë për qind edhe pse kemi 13 për qind dhe le të supozojmë që produktiviteti është diçka rreth dy për qind. Le ta zëmë, po ashtu, që rritja e pagave, edhe nën marrëveshjen, të cilën e kemi, do të shkonte ndoshta deri në 15 për qind. Bazuar në gjendjen ekonomike rritja e pagave do të mund të bëhej, për jo më shumë se 15 për qind – madje do të ishte edhe më e ulët”, ka thënë Suleman.

Sa i përket rrezikut nga deficiti buxhetor që mund të hyjë vendi në këtë vit, Suleman tërhoqi vërejtjen se Kosova duhet të ketë kujdes që deficiti i saj buxhetor të mos jetë më i lartë se pesë për qind e Bruto Prodhimit Vendor (GDP).

Për të menaxhuar deficitin, Suleman sugjeron institucionet e Kosovës që të gjejnë fonde apo të hyjnë në borxh.