Hajredin Kuçi me kërkesa konkrete në Athinë

Zëvendëskryeministri dhe ministri i Drejtësisë, Hajredin Kuçi, gjatë vizitës që është duke e zhvilluar në Greqi, ku po merr pjesë në konferencën e Bankës Botërore dhe të Organizatës Evropiane të së Drejtës Publike, që po mbahet në Athinë, për sistemet e drejtësisë në vendet e Evropës dhe të Azisë Qendrore,  është takuar më sekretarin Shtetëror në Ministrinë e Punëve të Jashtme të Greqisë, Ioannis-Alexios Zeppos.

Gjatë këtij takimi, ministri Kuçi, përveç kërkesës që ka bërë për njohjen e Kosovës nga ana e shtetit helen, nga sekretari Zeppos, ka kërkuar edhe uljen e tarifave-taksave të sigurimeve të automjeteve për qytetaret e Kosovës që hyjnë në Greqi, për mundësinë e prezencës dhe investimeve nga ana e investitorëve grek në Kosovë, si dhe bashkëpunimin në fushën akademike dhe mundësinë që studentëve kosovarë t’u ofrohen kushte dhe bursa studimore, për të studiuar në universitete greke.

Ndërsa, sekretari Shtetëror në Ministrin e Punëve të Jashtme të Greqisë, Zeppos, i ka mirëpritur kërkesat e ministrit Kuçi dhe ka thënë së do te bëjë përpjekje që t’i ndihmojë Kosovës në fushat e përmendura, ku me seriozitet janë duke e shqyrtuar mundësinë e investimeve dhe të uljes së tarifave të sigurimeve, për automjetet kosovarë që hynë në Greqi.