Brenda 11 muajve, asnjë kosovar nuk i është bashkuar ISIS-it

Ministri i Punëve të Brendshme i Republikës së Kosovës, Skender Hysen tha se parandalimi i shkuarjes në ISIS është bërë falë miratimit të Ligjit Kundër Pjesëmarrjes në Luftëra të Huaja

Në bazë të dhënave të Policisë së Kosovës, që nga muaji korrik i vitit të kaluar, nuk është regjistruar asnjë rast i shkuarjes së qytetarëve të Kosovës në vatrat e krizave, në Siri e Irak. Kështu ka deklaruar Ministri i Punëve të Brendshme i Republikës së Kosovës, Skender Hyseni, gjatë vizitave që po bënë nëpër komunat kosovare.

“Parandalimi i këtij fenomeni është bërë falë bashkëpunimit që kemi bërë bashkërisht edhe ju anëtarët e këshillave të sigurisë dhe miratimin të Ligjit Kundër Pjesëmarrjes në Luftëra të Huaja”, ka deklaruar ai.

Ministri i Punëve të Brendshme tha se trafikimi me qenie njerëzore është një problem që po përsëritet në vijimësi në Kosovë, dhe përveç ndërhyrjeve që bën Policia e Kosovës, ai tha se ka nevojë për një angazhim të spektrit më të madh shoqëror, social dhe politik.

“Problem e kemi edhe përdorimin e narkotikëve, ku kryesisht janë të përfshirë grupmoshat shkollore dhe është duke marrë përmasa shqetësuese. Ne duhet të gjithë së bashkë që të punojmë në parandalimin e konsumit të drogave në mënyrë që Policia e Kosovës të merret vetëm me personat që trafikojnë drogë”, theksoi Hyseni.