Për Europolin, kriminelët shqiptarë “më brutalët në Evropë”

Në një raport të publikuar në Bruksel nga agjencia e BE-së për sundimin e rendit dhe ligjit, EUROPOL, jepen vlerësime për rrezikun nga krimi i organizuar në Evropë, e ku Kosova dhe shqiptarët veçohen për të keqe.

Në këtë raport përmendet se “Ruta ballkanike” është ndër kryesorët për trafikimin e heroinës në vendet e BE-së.

“Shqipëria, Maqedonia dhe rajoni i Kosovës, në veçanti, janë lokacione të rëndësishme për deponim dhe ripaketim. Rajoni i Kosovës është po ashtu bazë e grupeve shqipfolëse të krimit të organizuar që janë aktive në trafikim në BE”, thuhet në këtë raport, i cili vlerëson rrezikun nga krimi i organizuar në Evropë.

Në raport potencohet se “grupet turke dhe ato shqipfolëse mbeten kryesoret në trafikimin e heroinës për në BE dhe brenda BE-së”.

Shqiptarë të grupeve të krimit të organizuar përmenden edhe si më brutalët në Evropë.

“Kriminelët shqipfolës janë të njohur për përdorimin e dhunës ekstreme, përfshirë edhe atë kundër viktimave gjatë plaçkitjeve. Shumë anëtarë të këtyre grupeve kanë përvojë nga shërbimet sekrete, policia apo organizatat paramilitare”, thuhet në raportin e EUROPOL-it.