Studentët: Liberalizimi i vizave – menjëherë!

Studnetët shprehin pakënaqësinë me procesin e liberalizimit të vizave, duke kërkuar që të përshpejtohet ky proces

Me rastin e 9 majit, Ditës së Evropës Përfaqësues të Parlamentit Studentor të Universitetit të Prishtinës, kanë vendosur një objekt simbolik para selisë së Komisionit Evropian. Në këtë mënyrë ata shprehin pakënaqësinë me procesin e liberalizimit të vizave, duke kërkuar nga institucionet ndërkombëtare e vendore, që të përshpejtohet ky proces.

Objekti i vendosur të cilin e vendosën përfaqësues të kësaj organizate studentore, kishte hartën e vendeve të rajonit dhe të drejtën e tyre për lëvizje të lirë, ndërkaq në mesin e vendeve të rajonit, vetëm Kosova nuk e ka një mundësi të tillë.

Kryetari i Parlamentit Studentor, Selim Daku tha se ky objekt, të cilën e kanë sjellë para selisë së Komisionit Evropian, paraqet gjendjen e shtetit të Kosovës, të cilit i pamundësohet lëvizja e lirë.

“Ne me këtë akt paraqesim pakënaqësinë tonë për mos lëvizje të lirë dhe kërkojmë nga instancat evropiane, Komisioni Evropian, por edhe nga qeveria jonë, që të përshpejtojnë procedurat e liberalizimit të vizave edhe për ne studentët edhe për qytetarët e Kosovës, në mënyrë që të mundësohet lëvizja e lirë e studentëve, të zhvillohen hulumtime në vende tjera, ku tani është e pa mundur”, ka thënë Daku.