Më 30 qershor dihet më shumë për liberalizimin e vizave

Tre deputetët e Parlamentit Evropian (PE) – raportuesja për Kosovën në PE, Ulrike Lunacek, raportuesja për liberalizim të vizave në PE, Tanja Fajon dhe Hannes Sëoboda, kryesues i Komitetit për Punë të Jashtme në PE, si dhe Grupi Punues për Ballkanin Perëndimor i PE-së, kanë marr përgjigje nga Presidenca hungareze e BE-së, të cilët kanë kërkuar fillimin e procesit të liberalizimit të vizave për Kosovën.

Në përgjigjen e Presidencës hungareze të BE thuhet se Këshilli i Ministrave i BE-së mund të thotë diçka rreth heqjes së vizave për Kosovën deri më 30 qershor.

Ndërsa ministri i Punëve të Brendshme të Hugarisë, Sandor Pinter nuk ka mundur të jap ndonjë afat rreth fillimit të procesit të liberalizimit të vizave për qytetarët e Kosovës. Por, në përgjigjen e Pinterit, të cilën e ka siguruar Express, thuhet se Hungaria është e përkushtuar për këtë çështje.

“Mund t’ju siguroj që Hungaria vazhdon të jetë fuqishëm e përkushtuar që të lehtësojë afrimin e vendeve të rajonit dhe BE”, ka thënë Pinter, shteti i të cilut kryeson BE-në në gjashtëmujorin e parë të këtij viti.

Në përgjigjen e Pinterit për Lunacek, Fajon dhe Sëoboda, thuhet se Këshilli i Ministrave të BE-së mund ta trajtojë liberalizimin e vizave për Kosovën, kur Komisioni Evropian të thotë fjalën e vet rreth procesit të monitorimit të liberalizimit të vizave për vendet e rajonit.

Kjo, sipas ministrit Pinter, mund të ndodhë gjatë Presidencës hungareze, e cila përfundon në fund të qershorit.