Për 5 vjet, 61 të vdekur në vendet e punës

Këto aksidente fatale bëhen edhe më të rënda për faktin se shumica e punëtorëve në Kosovë, sidomos ata në ndërtimtari, nuk kanë kontrata punë e as sigurime shëndetësore

Vetëm gjatë pesë vjetëve të fundit më shumë se 60 punëtorë kosovarë e kanë humbur jetën në vendin e punës, duke krijuar shifra alarmante. Këto aksidente fatale bëhen edhe më të rënda për faktin se shumica e punëtorëve në Kosovë, sidomos ata në ndërtimtari, nuk kanë kontrata punë e as sigurime shëndetësore.

Siç raporton “Zëri” gjatë 5 vjetëve të fundit në sektorin e ndërtimtarisë 61 qytetarë kanë humbur jetën në vendet e tyre të punës, ndërkaq 220 të tjerë janë lënduar lehtë e rëndë. Por në realitet numri i të lënduarve është shumë më i madh, pasi që një numër i konsiderueshëm nuk është raportuar fare.

Këto të dhëna janë pasqyruar në raportin e fundit të Zyrës së Auditorit të Përgjithshëm (ZAP) “Siguria në punë e punonjësve në sektorin e ndërtimtarisë”, i publikuar para pak ditësh.

“Numri i aksidenteve të rënda dhe në shumicën e rasteve edhe me pasoja fatale për shëndetin e punëtorëve është shqetësues dhe është rritur nga viti në vit. Pasojat nga moszbatimi i masave apo zbatimi i pamjaftueshëm i rregullave për sigurinë dhe shëndetin në punë është problem shqetësues për njerëzit dhe natyrën në nivel global”, thuhet në raport.

Analizat e bëra, sipas raportit, kanë treguar se sektori i ndërtimtarisë prin me numrin më të lartë të rasteve me lëndime, por edhe me vdekje të punëtorëve. “Duke u bazuar në këtë, ne kemi përzgjedhur për trajtim këtë sektor si një ndër sektorët më të ndjeshëm dhe me rrezik më të lartë krahas sektorëve tjerë”, thuhet në raport.