Ratko Mlladiq nuk deklarohet për akuzat

Ratko Mlladiq, akuzat për gjenocid dhe krime lufte i quajti “fjalë monstruoze” dhe “të padurueshme”

Në paraqitjen e tij të parë në Gjykatën e Hagës për Krime Lufte, i akuzuari Ratko Mlladiq tha se është “njeri shumë i sëmurë”, raporton REL.

Ai refuzoi të deklarohet lidhur me “akuzat e papranueshme”, akuzat për gjenocid, për krime të luftës dhe krime kundër njerëzimit.

“Unë nuk e mbroj këtu Mlladiqin, gjeneralin Mlladiq, por mbroj popullin tim, shtetin tim”, u përgjigj Mlladiqi, ndërsa kryesuesi i sqaroi se ai akuzohej dhe jo shteti, as populli i tij.

Gjyqtari kryesues, Alfons Ori, e caktoi datën e re për deklarim për fajësinë më 4 korrik.

I pyetur nga gjyqtari Ori se a i kupton të drejtat e tij si i akuzuar i Tribunalit të Hagës për krime të luftës në ish-Jugosllavi, Ratko Mlladiq tha se është njeri shumë i sëmurë dhe se i duhet më tepër kohë për t’i kuptuar akuzat.

“Sipas akuzave, ju, Ratko Mlladiq, akuzoheni për gjenocid, krime kundër njerëzimit, shkelje të ligjeve dhe rregullave të luftës, duke përfshirë edhe ndërmarrjen e përbashkët kriminale”, tha Orie.

Derisa e lexonte përmbledhjen e akuzave, Orie tregoi se rasti i Mlladiqit është i lidhur me rastin e Radovan Karaxhiqit, procesi ndaj të cilit tashmë ka nisur në Hagë.

Mlladiq ka qenë i njohur si “Kasapi i Ballkanit” gjatë luftërave të viteve ’90, për fushatë të ashpër që të marrë nën kontroll territore dhe më pas i “t’i pastrojë etnikisht”, pas shpërbërjes së ish-Jugosllavisë.

Avokati Aksel Hageldorn, që përfaqëson familjet e viktimave të Srebrenicës, ku ka ndodhur masakrimi i 8 mijë burrash dhe djemve boshnjakë, për orkestrimin e të cilit akuzohet Mlladiqi, ka thënë se është një lehtësim i madh përballja me drejtësinë e të akuzuarit.Të afërmit e viktimave të masakrës së Srebrenicës gjithashtu janë mbledhur në kryeqytetin e Bosnjës, që ta shohin përmes televizionit transmetimin e paraqitjes së parë të Mlladiqit para Tribunalit për Krime Lufte në Hagë.