Gruevski e Ahmeti, fitojnë zgjedhjet në Maqedoni

VMRO DPMNE, ka fituar 53 deputetë, LSDM-ja ka fituar 43 deputetë, BDI ka fituar 14 deputetë, PDSH 8 deputetë, RDK me 2 deputetë

VMRO-DPMNE dhe BDI fituan  zgjedhjet e djeshme të parakohshme parlamentare.VMRO-DPMNE ka shënuar epërsi te kampi politik maqedonas, ndërsa Bashkimi Demokratik për Integrim te kampi politik shqiptar, ka kumtuar kryetari i Komisionit Shtetëror të Zgjedhjeve në Maqedoni, Boris Kondarko, pak pas mesnate, pas përpunimit të rezultateve nga 98 për qind e vendvotimeve, raporton REL.Edhe asociacioni qytetar “Most”, i cili vëzhgoi zgjedhjet, ka publikuar rezultatet e para preliminare duke nxjerrë numrat e deputetëve.Sipas këtyre të dhënave të para, partia e kryeministrit Nikolla Gruevski, VMRO DPMNE, ka fituar 53 deputetë, Lidhja Social-Demokrate ka fituar 43 deputetë, Bashkimi Demokratik për Integrim ka fituar 14 deputetë, Partia Demokratike Shqiptare ka fituar 8 deputetë dhe Rilindja Demokratike Kombëtare 2 deputetë.

Kryetari i BDI-së, Ali Ahmeti gjithashtu ka uruar elektoratin shqiptar për fitoren në këto zgjedhje, duke theksuar se partinë e tij e presin përgjegjësi të mëdha.

Liderët e partive opozitare, menjëherë pas shpalljes së këtyre rezultateve, kanë uruar fitoren e kundërshtarëve politikë, duke u zotuar se interesat e qytetarëve do t’i mbrojnë duke vepruar si opozitë e fuqishme.Kryetari i LSDM-së, Branko Cërvenkovski, duke uruar VMRO-DPMNE-në për fitoren në këto zgjedhje, tha se është i kënaqur nga rezultati, pasi partia e tij ka dyfishuar numrin e deputetëve. Kjo, siç u shpreh Cërvenkoski, e bën jokomod kolltukun e kryeministrit me një opozitë të fuqishme.