Qeveria dhe komunat koordinohen për riatdhesimin

Qeveria e Kosovës ka ndarë një fond prej 3.5 milionë euro për ta lehtësuar procesin e riintegrimit nëpër komuna

Në kuadër të vizitave të parapara në të gjitha komunat e Kosovës, me qëllim të rritjes së koordinimit për te avancuar procesin e reintegrimit të personave të riatdhesuar, ministrja e Integrimit Evropian, Vlora Çitaku, ka realizuar takimet e para në qytetin e Pejës. Ajo është takuar me kryetarin e Pejës, Ali Berisha. 

Kryetari i Pejës ka thënë se e përkrahë përkushtimin e ministres Çitaku për të reintegruar të gjithë qytetarët e riatdhesuar dhe premtoi mbështetjen e plotë që ky proces të avancoj sa më shumë.

Ndërsa ministrja Çitaku, e cila vizitoi edhe komunën e Klinës dhe atë të Istogut, ka thënë se do të vazhdojë t’i vizitojë të gjitha komunat tjera për të parë të arriturat dhe sfidat në ketë proces.

“Tanimë të gjithë jemi të vetëdijshëm se procesi i integrimit evropian paraqet prioritet kyç dhe sfidë kryesore për të gjitha institucionet e Republikës Kosovës. Ky proces është një pako reformash që i kemi për obligim t’i realizojmë për qytetarët tanë, dhe në këtë sfond ne do të punojmë së bashku me të gjitha komunat, me qellim të ngritjes së kapaciteteve ne nivel komunal që procesi reintegrimi të jetë një tregim i suksesshëm për qeverisjen e vendit tonë”, ka thënë Çitaku.

Qeveria e Kosovës, duke qenë e vetëdijshme se komunat me kapacitetet e tyre nuk mund të përballen me këtë proces, ka ndarë një fond prej 3.5 milionë euro për ta lehtësuar procesin e reintegrimit nëpër komuna.