Hoxhaj, vizitë zyrtare në Jordani

Kjo vizitë e ministrit Hoxhaj pritet të ketë efekte të rëndësishme në forcimin e bashkëpunimit bilateral ndërmjet dy shteteve

Me ftesë të homologut jordanez, Nasser Judeh Ministri i Punëve të Jashtme i Kosovës, Enver Hoxhaj, do të qëndrojë në vizitë zyrtare në Mbretërinë e Jordanisë.

Gjatë kësaj vizite, ministri Hoxhaj do të zhvillojë takime me ministrin e Punëve të Jashtme të Mbretërisë së Jordanisë, me zyrtarë të tjerë të lartë të këtij shteti, si dhe me përfaqësues diplomatikë të vendeve të tjera të akredituar në Jordani.

Sipas një njoftimi për media të lëshuar nga Ministria e jashtme, ministri Hoxhaj do të njoftojë zyrtarët e lartë jordanezë dhe të shteteve të tjera për progresin e arritur në Kosovë që nga shpallja e pavarësisë, si dhe me proceset aktuale nëpër të cilat po kalon Kosova.

Duke marrë parasysh rolin e rëndësishëm të Jordanisë në botën arabe dhe më gjerë, vizita zyrtare e ministrit Hoxhaj në këtë vend pritet të ketë efekte të rëndësishme në forcimin e bashkëpunimit bilateral ndërmjet dy shteteve dhe në forcimin e subjektivitetit të Kosovës në arenën ndërkombëtare.