Diaspora është konsumuesi më i madh i produkteve nga Kosova

Programi 17 milionë dollarësh për katër vjet është orientuar tek bujqësia, ndërtimi, turizmi

Programi për Ndërmarrjet Private në Kosovë (KPEP), pas një analize të ekonomisë së Kosovës, me qëllim të përmirësimit të aftësisë konkurruese bëri përzgjedhjen e sektorëve me potencialin më të madh të rritjes, raporton DW.

Programi 17 milionë dollarësh për katër vjet u orientua tek bujqësia, ndërtimi, turizmi, riciklimi, ekonomia pyjore dhe përpunimit të drurit, teknologjitë e informatikës dhe komunikimit, lehtësim të kushteve për biznesin, zhvillimin e fuqisë punëtore si dhe në shërbimet për mbështetjen e bizneseve.

Rajonet përfituese janë varësisht nga specifikat e industrisë, thotë Virtyt Gacaferi, zyrtar për informim në projektin KPEP.

“Investimet më të mëdha në fushën e turizmit janë bërë në Rrafshin e Dukagjinit, përkatësisht në Pejë dhe në Rahovec. Në sektorin e mbjelljes së patates, rajoni më i përkrahur ka qenë Vushtrria.

Në pylltari, rajoni i Kaçanikut, komunat e Rrafshit te Dukagjinit dhe një pjesë e veriut të Kosovës. Pra, projekti është shtrirë në sektorë të ndryshëm, varësisht nga shtrirja gjeografike, ndërsa eksport ka në të gjithë sektorët e përzgjedhur”, thotë z.Gacaferi.

　

Rezultatet më të dukshme janë në sektorin e bujqësisë, ku është bërë identifikimi i problemeve të fermerëve, që nga identifikimi i varieteteve të reja, gjetja e tregjeve si dhe eliminimi i vështirësive në paketim dhe në marketing.

Musli Berisha, specialist i agrikulturës brenda programit, thotë se Ideja e projektit është që fermeri në Kosovë të orientohet në atë çka kërkon blerësi i fundit e jo çka ai di dhe mund të bëjë.

Dhe, me këtë kemi rezultatet e para, sepse janë identifikuar varietet e specit, të cilat në vend të 25 tonëve për një hektar të varieteteve tradicionale, ato japin mbi 80 ton për hektar.

Në Kosovë, për herë të parë është sjellë lloji i specit hungarez (CECEJ), janë organizuar fushata testuese dhe pasi kultivimi i tij ka rezultuar me sukses, është gjetur tregu”.

　 　

Prezantimi i cilësisë së frutave dhe perimeve nëpër panaire të ndryshme ka tërhequr vëmendjen e konsumatorit për produktet nga Kosova.

Në këtë rast, blerës i prodhimeve të Kosovës paraqitet diaspora dhe vetëm brenda vitit 2010, kompania Kelmendi ka eksportuar nga Kosova mbi 2000 ton speca, apo dy milionë kilogramë, të cilat i ka destinuar në tregun prej Suedisë e deri në Spanjë”.(DW)

　

---