Edhe Feith i hetuar nga EULEX-i?

Në kohën kur shefi i ICO-së dënonte korrupsionin në nivelet e larta të politikës kosovare, edhe ai vetë, zyrtarisht, ishte nën hetime

Sipas një shkrimi të botuar sot në gazetën Express të Prishtinës, edhe shefi i ICO’së, Pieter Feith gjendet në listat e të hetuarve nga EULEX-i. Në regjistrat e Prokurorisë Speciale, Pieter Feith figuron si një nga njerëzit që është hetuar nga prokurorë të EULEX’it. Gjithçka lidhet me zgjedhjen e guvernatorit të Bankës Qendrore të Kosovës, shkruan Express.

Në kohën kur shefi i Zyrës Civile Ndërkombëtare bënte deklaratat ku dënonte krimin e organizuar dhe korrupsionin në nivelet e larta të politikës kosovare, edhe ai vetë, zyrtarisht, ishte nën hetime nga Misioni Europian për Sundimin e Rendit dhe Ligjit, EULEX.

Burime të gazetës Express nga EULEX’i thonë se një prokuror i Prokurorisë Speciale të Kosovës e ka hetuar Pieter Feithin.

“Hetimet janë zhvilluar në lidhje me zgjedhjen e guvernatorit të Bankës Qendrore të Kosovës”, ka thënë zyrtari i EULEX’it.

Sipas tij, Pieter Feith dyshohet se ka qenë direkt i involvuar në zgjedhjen e guvernatorit.

“Ne kemi pasur dëshmi se z. Feith ka ndikuar te Bordi i Bankës Qendrore, që në pozitën e guvernatorit të zgjidhej Gani Gërguri. Dhe, siç është i njoftuar opinioni, tash z. Gërguri është duke e ushtruar këtë funksion”.