Foshnja me emrin Angela Merkel nuk fiton azilin në Gjermani!

Më 27 dhjetor të vitit të kaluar erdhi në jetë një vajzë dhe prindërit vendosen ta pagëzojnë në bazë të kancelares gjermane, Angela Merkel, në shenjë falënderimi se ishin vendosur në Gjermani

Gjermanët nuk lëshojnë pe. Madje, as në raste të veçanta. Në mediat gjermane ka bërë jehonë të madhe lajmi për foshnjën e cila është pagëzuar Angela Merkel, por që nuk ka fituar azilin, shkruan albinfo.ch.

Familja Alhamza ishte larguar nga Siria, duke u frikësuar nga terroristët dhe ishte vendosur në Gjermani. Më 27 dhjetor erdhi në jetë një vajzë dhe prindërit vendosen ta pagëzojnë në bazë të kancelares gjermane, Angela Merkel, në shenjë falënderimi se ishin vendosur në Gjermani.

Megjithatë, familja që tani jeton në Moenchengladbach kanë marrë një letër refuzuese nga autoritetet gjermane për kërkesën e azilit.

Kjo tregon se familja Alhamza nuk mund të sjellë familjarët e saj në Gjermani, megjithatë ka marrë një “mbështetje”, për të jetuar edhe një vit tjetër në Gjermani.

Ky shtim mund të bëhet maksimalisht edhe një vit, ndërsa vendimi mund të ndryshojë nëse familja mëson rrjedhshëm gjermanishten.