Qeveria mëton lehtësira në regjistrimin e bizneseve

Qeveria e Kosovës është në procesin e ndryshimit të ligjeve për aktivitetin biznisor, në përpjekje për të përmirësuar ambientin e të bërit biznes.

Me ndryshimet që pritet të aprovohen do të mundësohet shkurtimi i afateve për regjistrim të biznesit, përfshirë edhe heqjen e shpenzimeve për regjistrim.

Grupi punues i formuar për këto ndryshime ka përfunduar me shtatë projektligje, nga 12 sa do të ndryshohen.

Afati për regjistrimin e biznesit që është 10 ditë parashihet të shkurtohet në 3 ditë, kapitali fillestar për regjistrim si Shoqëri Aksionare nga 25 mijë euro sa është do të zvogëlohet në 15 mijë euro, ndërkaq pagesat aktuale për regjistrim të biznesit 5 euro dhe 22 euro, me ndryshimet e bëra do të heqen dhe regjistrimi i bizneseve do të mundësohet falas.