Serbia po tregon shenja të njohjës së shtetësisë së Kosovës, thotë Rohan

Zëvendësi i Marti Ahtisaarit, Albert Rohan, është i kënaqur me dialogun ndërmjet Kosovës dhe Serbisë. Ai ka shpreh bindjen që Serbia po tregon shenjat e njohjes së shtetësisë së Kosovës, derisa ka pranuar këtë dialog me përfaqësuesit e shtetit kosovar.

Një nga autorët e Pakos së Ahtisaarit, Rohan, shkon deri aty sa vlerëson se nuk është parësore që të shkohet nen për nen të propozimit të statusit, për atë nëse kosovarët duhet të pranojnë ose jo diçka gjatë dialogut aktual me Serbinë.

“Para se të verifikohet nëse Pako e Ahtisaarit po shkelet, kosovarët duhet që të verifikojnë nëse ato të cilat po dialogohen me Serbinë janë në të mirë të shtetit të ri”, ka deklaruar ai për Zërin.

Rohan ka thënë se ai merr informata të rregullta nga lidershipi kosovar se si po ecën dialogu aktual me Serbinë, ndërsa shprehet i kënaqur me zbatimin e Pakos së Athisaarit, me përjashtim të veriut të Kosovës.