Imamët kanë pak ndikim në orientimin fetar të myslimanëve të rinj

Autorët e studimit kanë konstatuar po ashtu se as predikuesit e fesë përmes internetit nuk kanë ndikim të theksuar te myslimanët

Imamët ose predikuesit islamë të fesë në xhamitë e Zvicrës duket se kanë fare pak ndikim te myslimanët e moshës së re. Në këtë përfundim ka ardhur një studim i realizuar nga një ekip studiuesish të Universitetit të Lucernit, shkruan srf.ch.

Autorët e studimit kanë konstatuar po ashtu se as predikuesit e fesë përmes internetit nuk kanë ndikim të theksuar te myslimanët, transmeton albinfo.ch. Kështu, sipas tyre është mbivlerësuar roli i të dyja këtyre formave të predikimit.

Ndërkaq, ndikim më të madh në ndërtimin e qëndrimit fetar kanë mendimet e shprehura nga prindërit dhe rrethi miqësor. Dhe, ky ndikim rezulton të jetë më i madh nga sa ishte menduar deri tash, ka thënë për radion srf studiuesja e islamit, Silvia Martens.

Studiuesit e Universtetit të Lucernit kanë realizuar 60 intervista të hollësishme me myslimanë të moshës 15 deri 30 vjeçare që jetojnë në Zvicër. Intervistat me ta janë fokusuar në orientimin e tyre  fetar, përcjell albinfo.ch. Pesë në gjashtë të intervistuar janë praktikues të fesë.

Përmes këtij studimi është synuar të hulumtohet “normaliteti mysliman” në Zvicër dhe jo vetëm ekstremet dhe margjina.