Nga korriku, mund të dhurojnë gjak edhe homoseksualët

Që nga paraqitja e AIDS-it, meshkujt nuk lejohen të japin gjak nëse nga viti 1977 e tutje kanë pasur seks me meshkuj të tjerë. Kjo lidhet me faktin se në atë kohë, nga fundi i viteve `70 të shekullit të kaluar është paraqitur AIDS-i

Meshkujt homoseksualë në Zvicër, pas një kohe të gjatë ndalese, do të kenë sërish të drejtë të dhurojnë gjak. Autoriteti mbikëqyrës për çështje mjekësore, Swissmedic ka miratuar një kërkesë të bërë nga organizata për dhurim të gjakut në kuadër të Kryqit të Kuq Zviceran (SRK) për anulimin e ndalesës së përmendur, shkruan sda.ch.

Si rezultat, nga korriku i këtij viti, edhe homoseksualët do të fitojnë të drejtën për dhënie gjegjësisht dhurim të gjakut, transmeton albinfo.ch. Por, për të dhuruar gjakun e tyre, ata duhet të plotësojnë një kusht: që në dymbëdhjetë muajt e fundit të mos kenë pasur marrëdhënie seksuale me meshkuj të tjerë. Sipas organizatës për transfuzionin e gjakut, afati i ndalesës prej 12 muajsh e ul ndjeshëm rrezikun nga ndonjë bartja e ndonjë sëmundjeje.

Që nga paraqitja e sëmundjes së imunitetit të dobësuar  (AIDS) meshkujt nuk lejohen të japin gjak nëse nga viti 1977 e tutje kanë pasur seks me meshkuj të tjerë. Kjo lidhet me faktin se në atë kohë, nga fundi i viteve `70 të shekullit të kaluar është paraqitur AIDS-i.

Organizata e transfuzionit të gjakut në kuadër të SRK ka alarmuar së fundi lidhur me mungesën e rezervave të gjakut. Vala e hershme dhe e fortë e gripit e kombinuar me sëmundje të ndryshme të lukthit e të zorrëve, ka shkaktuar ulje të rezervave të gjakut.