Sesioni federal i rinisë i vitit 2017: “Thuaji politikës atë që duhet ta thotë ajo!”

Nga 28 shkurti (sot) deri më 17 mars, të gjithë të rinjtë nga e gjithë Zvicra kane mundësi që përmes votimit online në www.jugendsession.ch të vendosin se cilat janë temat që i shqetësojnë ata dhe të cilat do të duhej të debatoheshin në sesionin rinor

Sesioni Federal i Rinisë është një aktivitet i njohur në nivel të Zvicrës, i cili u shërben të rinjve zviceranë si një platformë politike me shumë vlerë. Përmes sesionit rinor, për çdo vit më shumë se 200 të rinj përfitojnë një tablo mbi zhvillimet në politikën zvicerane dhe fitojnë një shans që në të informohen lidhur me proceset politike dhe mundësitë për bashkëveprim. E gjithë kjo sigurisht e ngjall motivimin e tyre për veprimtari të tjera politike ose për angazhimin e tyre në sferën e shoqërisë civile.

Në sesionin e të rinjve, janë vetë të rinjtë ata që vendosin se cilat tema do t`i vendosin në rend dite. Nga 28 shkurti (sot) deri më 17 mars, të gjithë të rinjtë nga e gjithë Zvicra kane mundësi që  përmes votimit online në www.jugendsession.ch të vendosin se cilat janë temat që i shqetësojnë ata dhe të cilat do të duhej të debatoheshin në sesionin rinor.

Sesioni i sivjetmë mbahet nga 9 deri më 12 nëntor në Bernë. Të rinjtë e interesuar, të moshave 14 deri 21 vjeçare mund të paraqiten përmes adresës www.jugendsession.ch. Afati për paraqitje përfundon më 14 shtator 2017.