Kosova nuk ka importuar mish të kontaminuar nga Brazili

Agjencia e Ushqimit dhe Veterinarisë në Kosovë, ka dal me një komunikatë media, duke ua hequr dilemat qytetarëve, se nga asnjëra kompani e Brazilit që dyshohen për mish të kalbur, Kosova nuk ka importuar mish

Skandali i mishit të kontaminuar të Brazilit që ka përfshirë një pjesë të madhe të Evropës, ka ngjallur reagime edhe në Kosovë. Por, pas dyshimeve që kanë përfshirë vendin, Agjencia e Ushqimit dhe Veterinarisë në Kosovë, ka dal me një komunikatë media, duke ua hequr dilemat qytetarëve, se nga asnjëra kompani e Brazilit që dyshohen për mish të kalbur, Kosova nuk ka importuar mish.

Sipas njoftimit, AVUK përmes sektorit të kontrollit veterinarë kufitar, ka gjurmuar të gjitha ngarkesat e mishit të importuara në vitet e fundit në Kosovë, dhe nuk është gjetur asnjë ngarkesë e importuar nga fabrikat të cilat janë publikuar me emra dhe kode nga shteti i Brazilit.

“Importi i mishit dhe nënprodukteve të mishit nga shteti i Brazilit është lejuar vetëm nga  lista e thertoreve dhe fabrikave të cilat kanë qen të aprovuara nga Bashkimi Evropian apo që u lejohet të eksportojnë në BE. Asnjëra nga fabrikat të cilat kanë shitur mish të dyshimtë nuk është në këtë listë, për ketë arsye ende për momentin nuk është ndërmarr ndonjë vendim për ndalës nga ne dhe vendet e BE-së”, thuhet në njoftimin e AVUK-ut.

Ky institucion, thotë se është duke monitoruar vazhdimisht sistemet e lajmërimit të rrezikut siç janë RASSF dhe Traces sistem.

“Të gjitha vendimet apo njoftimet për ndonjë rrezik në ndonjë ngarkese bëhen publike, po ashtu kemi kontakte të vazhdueshme me autoritete të shteteve dhe të BE-së. Çfarëdo mase që do të ndërmerret nga ana e tyre ne do ta aplikojmë edhe ne vendin tonë. Ne me trupat tona inspektuese jemi permanent në pikat e kontrollit kufitar dhe terminale doganore. Asnjë ngarkesë me ushqime pa aprovimin tonë nuk zhdoganohet, andaj mbi secilin dyshim të paraqitur veprojmë konform rregullave ligjore për të garantuar siguri të produkteve ushqimore për konsum”, thuhet në njoftimin e AVUK-ut.