Numri i azilkërkuesve ka rënë për 500 për qind

“Në kuadër të këtij progresi vlen të përmendet që numri i azilkërkuesve ka rënë për 500 për qind nga 72,491 në vitin 2015, në 11,475 në 2016”, tha Mimoza Ahmetaj, ministre e Integrimit Evropian

Numri i qytetarëve të Kosovës që kanë kërkuar azil në vendet e Bashkimit Evropian në vitin 2016, ka rënë për 500 për qind krahasuar me vitin 2015. Kështu ka deklaruar ministrja e Integrimit Evropian, Mimoza Ahmetaj në prezantimin e saj para Komisionit Parlamentar për Stabilizim-Asociim.

Ajo tha se sa i përket procesit të liberalizimit të vizave, Komisioni Evropian ka konfirmuar progresin e arritur në kuadër të përmbushjes së kriterit për luftimin e korrupsionit.

“Në kuadër të këtij progresi vlen të përmendet që numri i azilkërkuesve ka rënë për 500 për qind nga 72,491 në vitin 2015, në 11,475 në 2016. Ndërsa numri i përfituesve nga Fondi i Riintegrimit është rritur për 100% nga 2,912 në vitin 2015 në 5,786 në 2016”, ka deklaruar ajo, citon Koha.

Në këtë takim u diskutua edhe për Instrumentin Para Anëtarësimit (IPA). Ministria e Integrimit Evropian ka finalizuar programimin e IPA 2016 (pjesa e parë) në vlerë totale prej 45.5 milionë euro dhe se momentalisht negociatat janë duke vazhduar për mbështetje direkte buxhetore nga fondet e BE-së në sektorin e administratës publike në vlerë prej 25 milionë euro si pjesë e marrëveshjes financiare për IPA 2016.