Bizneset kopjojnë njëri-tjetrin

Shumica e bizneseve në Kosovë kopjojnë njëri-tjetrin, dhe njëkohësisht dëmtojnë njëra-tjetrën. Kosova është vendi me importin më të madh në rajon dhe më gjerë

Mbi 150 mijë biznese veprojnë në Kosovë që janë të regjistruara, ku më shumë se 90 % e tyre janë ndërmarrje të vogla ose të mesme, raporton ‘Evropa e Lirë’.

Megjithatë, shumica kopjojnë njëri-tjetrin, duke krijuar kështu konkurrencë të panevojshme në treg dhe duke dëmtuar njëra-tjetrën, përcjell albinfo.ch.

Kosova është vendi me importin më të madh në rajon e më gjerë dhe ka nevojë për lloje të ndryshme të bizneseve.

Në mungesë të një industrie të zhvilluar të prodhimtarisë, Kosova vazhdon të importojë gati të gjitha produktet, duke filluar nga ato të konsumit, deri te produktet strategjike.

Vlera totale në vit e mallrave të importuara në Kosovë sipas të dhënave zyrtare, arrin shifrën në mbi 2.5 miliardë euro, derisa eksporti i produkteve të Kosovës në vendet e rajonit dhe Evropës, nuk arrin vlerën mbi 300 milionë euro në vit.