Gjermania financon projektin për aftësim në fushën e auto-mekanikës

Oda e Zejtarisë së Dortmundit dhe Oda Ekonomike e Kosovës kanë prezantuar projektin për aftësimit profesional në fushën e automekanikes, i financuar nga Qeveria Gjermane, që ka për synim përmirësimin e të ardhurave dhe punësimin e njerëzve në sektorë të ndryshëm.

Nga ky projekt do të përfitojnë profesorët e auto-mekanikës dhe nxënësit e shkollës së Mesme Mekanike “Shtjefën Gjeqovi në Prishtinë, e cila po ashtu ka përfituar nga ky projekt edhe pajisjet më të fundit teknike në këtë fushë.

Bernd Techau, ekspert i auto-mekanikës, ka thënë se ky projekt ndikon në zhvillimin ekonomik të vendit dhe synon aftësimin e atyre që punojnë në drejtimin e auto-mekanikës.

Ndërkaq, Luljeta Aliu-Krasniqi, menaxhere e projektit, ka thënë se ky projekt do t’i mundësojë nxënësve që pasi ta përfundojnë shkollimin e tyre ta kenë më të lehtë punësimin, duke e dikur se ky është ndër kurset më profesionale në vendin tonë.

Projekti parasheh trajnime intensive për mësimdhënësit në radhë të parë si dhe ofron kurse për aftësimin e bashkëpunëtorëve të ndërmarrjeve në fushën e auto-mekanikës dhe do të zgjasë tri vjet.