Kantoni Thurgau do të heqë gjuhën frënge nga shkollat fillore

Komisioni i ka rekomanduar parlamentit që mësimi i gjuhës frënge të shtyhet për ciklin e lartë (sekundarstufe, nga klasa e shtatë e tutje)

Kantoni Thurgau do ta heqë nga programi i shkollave fillore mësimin e gjuhës frënge. Për këtë ka marrë qëndrim Komisioni përgatitor i Parlamentit të Kantonit, bën të ditur tagblatt.ch. Komisioni në fjalë i ka rekomanduar parlamentit që të ndryshojë ligjin për arsimin, në mënyrë që mësimi i gjuhës frënge të shtyhet për ciklin e lartë (sekundarstufe, nga klasa e shtatë e tutje). Ky qëndrim është votuar nga  9 anëtarë dhe është kundërshtuar nga 5 sish.

Komisioni ka hedhur poshtë edhe propozimin e kompromisit të bërë nga këshilltarja qeveritare Knill, që frëngjishtja të mësohet nga klasa e gjashtë.

Propozimi, në Parlamentin e kantonit vjen më 5 maj.

Ky parlament në gusht të vitit 2014 kishte marrë vendim që të hiqte nga programi i shkollave mësimin e gjuhës frënge për nxënësit e ciklit të ulët të fillores. Arsyetimi ishte se krahas anglishtes, e cila mësohet nga klasa e tretë, mësimi i edhe një gjuhe tjetër të huaj ishte ngarkesë e madhe për nxënësit, transmeton albinfo.ch. Një vendim i tillë kishte ngjallur kritika gjithandej madje edhe ministri Alain Berset kishte kërcënuar që çështja e gjuhës të trajtohej në nivelin federal.