Shefi i SDC-së, për vizitë në Shqipëri

Sager ka vizituar në terren projektet zvicerane në vazhdim në arsimin profesional, qeverisje vendore dhe shëndetësi.

Ai shoqërohej nga Andreas Gerrits, zëvendësdrejtor i Divizionit të Ballkanit Perëndimor në SDC, nga ambasadori zviceran, Christoph Graf dhe përfaqësues nga Ambasada e Zvicrës.

Siç raporton Agjencia Telegrafike Shqiptare, në ndalesën e parë në Lezhë, Sager vizitoi shkollën profesionale “Kolin Gjoka”, e mbështetur nga projekti zviceran “Aftësi për punë”.

Sager pati shkëmbime me drejtuesit e shkollës dhe stafin e projektit, ku mësoi mbi arritjet dhe sfidat në fushën e arsimit profesional. Zvicra mbështet reformat e sistemit të arsimit profesional në Shqipëri dhe ndihmon në harmonizimin e arsimit profesional me praktikën.

Në ndalesën e dytë, në Burrel, Sager u takua me kryetarin e Bashkisë, Nezir Rizvani dhe mësoi mbi reformën territoriale administrative, decentralizimin dhe planet e zhvillimit vendor. Ai vizitoi Qendrën e re me Një Ndalesë në Burrel, e cila lidh qendrat rurale dhe urbane përmes shërbimeve elektronike për qytetarët.

Delegacioni zviceran vizitoi dy qendra shëndetësore të mbështetura përmes programit “Shëndet për të gjithë”, financuar nga qeveria zvicerane. Ai u takua me profesionistë të shëndetësisë, doktorë dhe infermiere, të cilët janë pjesë e grupeve të rishikimit, ku ndahen njohuri profesionale dhe merren kreditë për përparimin profesional.
Së fundi, delegacioni vizitoi ish-kampin e punës dhe burgun e Spaçit, ku u njohën me të kaluarën komuniste të Shqipërisë si dhe u takuan me një ish të burgosur.

Vizita vazhdon në dy ditët e ardhshme me takime të planifikuara me kryeministrin Edi Rama, ministren e Ekonomisë, Turizmit, Tregtisë dhe Sipërmarrjes, Milva Ekonomi dhe ministren e Shëndetësisë, Ogerta Manastirlliu.