Kryetarja e Cyrihut u dërgon 40 mijë të huajve ofertë për të marrë pasaportën zvicerane

Kryebashkiakja e Cyrihut, Corine Mauch dhe sekretarja Claudia Cuhe-Curti u janë drejtuar me letra 40 mijë banorëve të Cyrihut të cilët i kanë plotësuar kushtet ligjore për të marrë pasaportën e Zvicrës

Qyteti i Cyrihut u rekomandon të huajve që të bëjnë qysh këtë vit kërkesën për pasaportë zvicerane. Kështu, autoritetet e Cyrihut u kanë dërguar 40 mijë të huajve letra me ftesa për të aplikuar për shtetësinë zvicerane. Në ato letra, të adresuarve u kujtohet se duke filluar nga viti i ardhshëm rruga për te natyralizimi do të bëhet dukshëm më e vështirë.

Kryebashkiakja e Cyrihut, Corine Mauch dhe sekretarja Claudia Cuhe-Curti u janë drejtuar me letra 40 mijë banorëve të Cyrihut të cilët i kanë plotësuar kushtet ligjore për të marrë pasaportën e Zvicrës, shkruan albinfo.ch Aty u shpjegohet se nga 1 janari 2018  do të vlejnë rregulla të reja.

“Këshilli i Qytetit e vlerëson të rëndësishme që sa më shumë banorë të Cyrihut të kenë mundësi të pjesëmarrjes në proceset e demokracisë direkte”, ka thënë Nat Bächtold, zëdhënës i Zyrës presidenciale të Cyrihut. “Sa më shumë njerëz të marrin pjesë në të, aq më e gjallë është demokracia”. Së këndejmi është e dëshirueshme që të huajt të natyralizohen kur t`i kenë përmbushur kriteret.

Muajve të fundit është aktualizuar shumë çështja e natyralizimit të të huajve, në dritën e ndryshimeve që priten në ligjin mbi natyralizimin dhe të huajt që hyn në fuqi në vitin 2018, shkruan albinfo.ch. Me ligjin e ri, kriteret ashpësohen në kuptimin që të drejtë aplikimi do të kenë vetëm të huajt me leje të përhershme qëndrimi (Vizë C). Nga ana tjetër, aty parashihet që periudha e qëndrimit në Zvicër si kusht për kërkim të pasaportës të shkurtohet nga 12 në 10 vjet.