Bildt: Veriu, detyrë shtëpie për Prishtinën

"Ka serbë edhe në jug të Ibrit dhe as ata nuk thonë se e duan pavarësinë e Kosovës, por ata e kanë pranuar pavarësinë dhe jetojnë në të"

“Institucionet e Kosovës duhet të fitojnë përkrahjen e qytetarëve të veriut të Kosovës”, ka qenë porosia e ministrit të Punëve të Jashtme të Suedisë, Carl Bildt, drejtuar kosovarëve, gjatë vizitës së tij në Prishtinë.

Sipas tij, mbështetjen e qytetarëve serbë të veriut të Kosovës mund ta sigurojë vetëm Prishtina dhe askush tjetër, shkruan telegrafi.com.

“Kjo nuk është e lehtë, por duhet të arrihet. Në të kundërtën ekziston rreziku që ai problem mund të zgjas për një kohë. Nuk janë në pyetje ditët dhe javët, por është në pyetje çështja e viteve për të pasur integrim të plotë”, tha Bildt pas takimit që pati me homologun e tij, Enver Hoxhaj.

“Në veri të Kosovës ka njerëz që nuk e duan pavarësie e Kosovës, por ka edhe serbë të cilët jetojnë në jug të lumit Ibër dhe nuk jam i sigurt që ata thonë se e duan pavarësinë e Kosovës, por ata e kanë pranuar pavarësinë dhe jetojnë në të”, tha shefi i diplomacisë suedeze.

Gjatë qëndrimit në Prishtinë ai është pritur edhe nga shefja e delegacionit të Kosovës në bisedimit teknike me Serbinë, Edita Tahiri dhe nga kryeministri Hashim Thaçi.

Hoxhaj dhe Bildt u pajtuan që ndryshimi i kufijve në Ballkan është një kapitull i mbyllur. Ata theksuan po ashtu nevojën dhe rëndësinë e perspektivës evropiane të Republikës së Kosovës, konkretisht se si Suedia ta ndihmojë Kosovën në procesin e dialogut për liberalizimin e vizave.

Hoxhaj po ashtu kërkoi ndihmën nga homologu i tij për mbështetjen e Suedisë në ndërtimin e marrëdhënieve kontraktuale në mes të Republikës së Kosovës dhe institucioneve të Bashkimit Evropian.