Fillon transmetimin Al Jazeera për Ballkan

Shef i programit që transmetohet nga Sarajeva, është gazetari kroat Goran Milic, i njohur për projektin e tij nga viti 1990, "Yutel"

Transmetuesi i njohur arab Al-Jazeera fillon këtë të premte emetimin e programit të tij për Ballkanin perëndimor. Selia e këtij transmetuesi do të jetë në Sarajevë ndërsa do të ketë studiot e veta edhe në Beograd, Zagreb dhe Shkup.

Al Jazeera e Ballkanit do të emetojë gjashtë orë në ditë program në gjuhët boshnjakisht, kroatisht deh serbisht. Në kohën tjetër do të emetohet programi i transmetuesit amë, pra Al Jazeera International, shkruan die Presse.com.

Shef i programit të Al Jazeera për Ballkan është gazetari i njohur kroat Goran Milic. Ai, me projektin e ri do të rivendosë lidhjet me përvojat e tij nga viti 1990 kur drejtonte televizionin Jutel, që selinë e kishte po ashtu në Sarajevë. Jutel, që synonte t`i kundërvihej tendencave centraliste të qeverisë së atëhershme jugosllave, u mbyll në vitin 1991 me fillimin e luftërave në Ballkan.

Shumica e gazetarëve të Al Jazeera Balkan kanë fituar përvojat e tyre në shtëpi të ndryshme televizive të Serbisë, Kroacisë dhe Bosnjës.

Me gjithë përpjekjet për të mos u identifikuar me projektin e tij të mëparshëm Yutel, al jkazeera e Ballkanit qysh tash nga populli ka nisur të quhet “Juteli i ri”.