Reciprociteti tregtar me Serbinë, të kushtëzohet me njohje të Kosovës

Për opozitën dhe një pjesë të shoqërisë civile, Qeveria po zbaton pa nevojë njëanshëm "marrëveshjen teknike"

Nëse shumica parlamentare e mbështet mocionin e ri të lëvizjes “Vetëvendosje”, i cili do të hidhet në votim ditën kur ministrja e Tregtisë, Mimoza Kusari-Lila, do të paraqitet për interpelancë në Kuvend, atëherë Qeveria e Kosovës, do të detyrohet që t’i rikthejë masat e reciprocitetit tregtar me Serbinë, derisa shteti fqinjë ta njohë formalisht Kosovën si shtet të pavarur dhe sovran, shkruan Koha Ditore.

Masat e reciprocitetit tregtar me Serbinë dhe me Bosnjë-Hercegovinën, u patën vendosur me 20 korrik, mirëpo, u patën hequr pa u bërë dy muaj të plotë, si rezultat i një marrëveshjeje të arritur në Bruksel mes ekipeve negociatore të Prishtinës dhe Beogradit.

Nga 16 shtatori, dita kur janë hequr këto masa, konsiderohet se në Serbi kanë hyrë fare pak mallra të Kosovës, ndërkohë që shumëfish më tepër kanë hyrë nga Serbia në Kosovë.

Për opozitën dhe një pjesë të shoqërisë civile, Qeveria është duke vazhduar pa nevojë ta zbatojë njëanshëm “marrëveshjen teknike”, pasi kështu është duke u dëmtuar ekonomia vendëse.