Kosova po përballet me papunësinë dhe varfërinë

Kosovarët identifikojnë papunësinë (40%) dhe varfërinë (20%), si dy problemet më të mëdha me të cilat përballet Kosova

Në Kosovë, më shumë se gjysma e të gjithë të anketuarve (55%) janë të shprehur të gatshëm të bashkohen në protesta publike për arsye politike, derisa rreth 70% do ta bënin këtë për arsye ekonomike.

Këto të dhëna jepen në raportin Pulsi Publik të UNDP-së, që është një analizë e zgjeruar e fakteve të shpejta të cilat janë lansuar më parë, raportojnë mediet në Prishtinë.

Në këtë raport thuhet pos tjerash se rreth 59% e të anketuarve presin që kushtet ekonomike të përmirësohen gjatë dy vjetëve të ardhshme, derisa 25% e tyre nuk shohin ndonjë ndryshim që do të ndodhë, ndërsa rreth 16% presin që gjendja të keqësohet.

Sipas të dhënave të anketës, kosovarët identifikojnë papunësinë (40%) dhe varfërinë (20%) si dy problemet më të mëdha me të cilat përballet Kosova. Problemi i tretë më madhor me të cilin përballet Kosova është korrupsioni (6%).

Sa i përket asaj se kush mban përgjegjësinë kryesore për gjendjen ekonomike të Kosovës, rreth 67% e të gjithë kosovarëve ia vënë këtë përgjegjësi Qeverisë së Kosovës.

Jo më shumë se 12% e të anketuarve ia japin këtë përgjegjësi bashkësisë ndërkombëtare (EULEX, ZNC dhe UNMIK së bashku), derisa vetëm rreth 3% kanë zgjedhur qeverinë lokale si përgjegjësen më të madhe për gjendjen ekonomike të Kosovës, derisa vetëm 2.5% e bartin këtë përgjegjësi tek komuniteti i biznesit.

Mesatarisht, 33% e kosovarëve besojnë që lidhjet familjare janë faktori më i rëndësishëm, pasuar nga ata (19%) që besojnë që ryshfetet janë faktori më i rëndësishëm në kuptimin e mundësisë së punësimit në sektorin publik.

Vetëm 15% e të anketuarve besojnë që arsimi është i rëndësishëm kur kërkohet punësim në sektorin publik, pasuar nga 10% që besojnë që anëtarësia partiake është gjëja më e rëndësishme.