Çitaku: Azili nuk është zgjidhje në rrugën drejt integrimeve evropiane

Ministrja e Integrimit, Vlora Çitaku theksoi se qytetarët e Kosovës nuk duhet të kërkojnë azil ngase BE-ja nuk i do ata si barrë

Ministrja e Integrimit, Vlora Çitaku, pas një takimi me kryetarin e Prishtinës, Isa Mustafa, duke folur për procesin e liberalizimit të vizave, theksoi se azil-kërkimi nuk është më zgjidhje në rrugën drejt integrimeve evropiane.

Ministrja theksoi se qytetarët e Kosovës nuk duhet të kërkojnë azil pasi që, sipas saj, BE-ja nuk i do ata si barrë.

Çitaku u bëri thirrje atyre që ta presin liberalizmin e vizave, edhe pse tha se ende nuk e di sa do të zgjasë ky proces, pas fillimit të dialogut, që pritet të ndodhë në dhjetor.

Ajo tha se po mundohen të ndërtojmë një të ardhme të kënaqshme për të gjithë qytetarët brenda Kosovës.

„Qytetarët e Kosovës janë hisenikë të progresit në Kosovës dhe se duhet të kryhen obligimet nga secili qytetarë rreth procesit të ri-integrimit sepse varet në masë të madhe edhe liberalizimi  i vizave“, tha ministrja Çitaku.

Ministrja Çitaku tha që deri më tani kam vizituar gati të gjitha komunat  e Kosovës dhe është shprehur e kënaqur me nivelin e punës që është bërë deri më tani.

Kryetari i Komunës së Prishtinës, Isa Mustafa ka përshëndetur  vendimin e Ministrisë së Integrimeve Evropiane që të ngritet shuma e lejuar për hapjen e bizneseve për ri-integrimin e personave nga 2000 euro në 5000 euro.

Ky është një stimulim shumë i mirë për të gjithë personat të cilët dëshirojnë të zhvillojnë bizneset e tyre private dhe do të ndikojë në mënyrë direkte në parandalimin e ikjes së tyre prapa.