Deficiti tregtar 1.5 miliardë euro

Deficiti tregtar i Kosovës vazhdon të rritet dita- ditës, duke u bërë pengesë shumë serioze për zhvillimin ekonomik të vendit.

Sipas të dhënave të fundit të Bankës Qendrore të Kosovës deri në tremujorin e tretë të kwtij viti deficiti tregtar në Kosovë arriti vlerën prej 1.5 miliardë euro, duke shënuar një rritje vjetore prej 13.5 për qind.

Gjatë kësaj periudhe kohore eksportet shënuan një normë vjetore të rritjes prej 12.7 për qind, duke arritur vlerën prej 241.6 milionë euro, ndërsa importet shënuan rritje vjetore prej 13.4 për qind dhe arritën vlerën prej 1.76 miliardë euro.

Efekti i rritjes së eksporteve vazhdon të zbehet nga rritja e importeve për sa i përket ndikimit në vlerën e bilancit tregtar, duke pasur parasysh se importet janë rreth shtatë herë më të larta se sa eksportet, raporton Telegraf.

Sipas të dhënave të BQK-së, niveli i mbulueshmërisë së importeve me eksporte në tremujorin e tretë të vitit 2011 ishte 13.7 për qind, një nivel i ngjashëm me periudhën e njëjtë të vitit të kaluar.

Struktura e eksporteve të Kosovës vazhdon të dominohet nga metalet bazë, të cilat posedojnë një pjesëmarrje prej 62.1 për qind në gjithsej eksportet e Kosovës. Deri në fund të tremujorit të tretë të vitit 2011, eksporti i metaleve bazë shënoi rritje vjetore prej 11.3 për qind.