Bizneset franceze interesohen për Kosovën

Bizneset franceze janë duke shikuar rajonin e Ballkanit si një nga vendet më me potencial të rritjes ekonomike në vitet e ardhshme

Në kuadër të vizitës në Francë, ministrja e Tregtisë dhe Industrisë së Kosovës, Mimoza Kusari – Lila, takoi edhe shoqatat që përfaqësojnë bizneset franceze, Lëvizja e ndërmarrjeve në Francë (MEDEF) dhe UbiFrance, thuhet në një njoftim të kësaj ministrie.

Me këtë rast ajo prezantoi mundësitë investive në sektorët e ndryshëm të ekonomisë në Kosovë, si: agrobiznesi, infrastruktura, energjia, si dhe sektori  i shërbimeve të teknologjive informative.

Phillipe Gautier, drejtor për marrëdhënie ndërkombëtare në MEDEF, theksoi se bizneset franceze janë duke shikuar rajonin e Ballkanit si një nga vendet më me potencial të rritjes ekonomike në vitet e ardhshme dhe se janë të interesuar për të thelluar bashkëpunimin ekonomik.

Gjatë takimit u diskutuan  iniciativa konkrete, siç është mbajtja e një forumi ekonomik Franko-Kosovar, në pranverë të vitit të ardhshëm në Kosovë.

MEDEF ka më shumë se 700 mijë firma të anëtarësuara, 90 për qind të tyre i takojnë grupit të ndërmarrjeve të vogla dhe të mesme, ndërsa UBIFRANCE, e cila vepron në kuadër të Ministrisë së Ekonomisë së Francës, është Agjenci për Promovim të Eksportit dhe operon në 46 shtete.