Sivjet 6 mijë hektarë me grurë më shumë se vjet

Kanë përfunduar mbjelljet vjeshtore të kulturave levërtare bujqësore në Kosovë, ka ka bërë të ditur Ministria e Bujqësisë, Pylltarisë dhe Zhvillimit Rural nëpërmjet një kumtesë.

Sipas Ministrisë, në bazë të raporteve të 32 drejtorive komunale bujqësore, gjithsej sipërfaqe të mbjella në vitin 2011 janë 90.503.6 hektarë me kultura levërtare. Prej këtyre, 83.875 hektarë janë mbjellë me grurë, që krahasuar me vitin e kaluar më shumë janë rreth 6.000 hektarë, 3905 hektarë me elb, 921.6 me thekër dhe 1802 me bimë foragjere.

“Kushtet e favorshme klimatike që kanë mbizotëruar kanë mundësuar që me kohë të përfundojnë mbjelljet vjeshtore, në përjashtim të kulturës levërtare të grurit që ka vazhduar të mbillet edhe pas afatit optimal”, thuhet në kumtesë.

Ministria e Bujqësisë, Pylltarisë dhe Zhvillimit Rural nëpërmjet pagesave direkte edhe këtë vit do t’i mbështes fermerët në mbjelljet e kulturës bujqësore të grurit me nga 100 euro për sipërfaqet që janë në përputhje me kriteret e përcaktuara në shpalljen publike.