Protesta në Luginë të Preshevës për Ditën e Flamurit

Protesta është mbajtur kundër diskriminimit të vazhdueshëm të Beogradit zyrtar që po i bëhet shqiptarëve të këtij rajoni

Në mesin e protestuesve në Preshevë e Bujanoc ishin edhe përfaqësues të subjekteve politike shqiptare.

“Lugina e Preshevës vazhdon të jetë e tensionuar, si pasojë e vijimit te politikës së injorimit të lirive dhe të drejtave themelore të njeriut nga politika zyrtare e Beogradit dhe nga mungesa e duhur e vëmendjes së faktorit ndërkombëtar për këtë rajon”,  u tha në fjalën hyrëse të protestave.

“Mospërfillja e  kërkesave për realizimin e të drejtave individuale dhe kolektive të shqiptarëve të Luginës së Preshevës, arrestimet në vazhdimësi të shqiptarëve, moslejimi i përdorimit të gjuhës dhe shkrimit shqip dhe simboleve kombëtare, Militarizimi i Luginës me forca të uniformuara paraushtarake dhe ushtarake, janë probleme me të cilat po ballafaqohemi për ditë”, u thanë të jenë problemet me të cilat shqiptarët po ballafaqohen çdo ditë në këtë rajon.

Kjo është protesta e tretë e shqiptarëve që organizohet në Luginë të Preshevës kundër kufizimeve të përdorimit të simboleve kombëtare shqiptare.