Moutier vendosi: Tash e tutje i takon Kantonit Jura!

Qeveritë e kantoneve të prekura: e Bernës dhe ajo e Juras tash do ta ndjekin një procedurë të përbashkët për të jetësuar në praktikë ndryshimin të cilin sot e votoi populli

Keystone

Me 51.7% të votave, qytetarët që votuan sot në Moutier kanë vendosur: qyteti frankofon që deri sot i takonte kantonit të Bernës, tash e tutje do t`i takojë Kantonit Jura.

Me këtë votim i është dhënë fund dramës që ka zgjatur shumë, lidhur me fatin e kësaj komune dhe qyteti.

2067 votues kanë qenë për kalimin në Jura dhe 1930 sish, kundër, transmeton albinfo.ch mediat zvicerane.

Katër vite më parë, në vitin 2013 qytetarët e regjionit të Jura-s së Bernës në një referendum kishin votuar me shumicë për të mbetur në Bernë. Çështja që shtrohej ishte themelimi i një kantoni tjetër ose bashkimi me kantonin ekzistues frankofon të Jura-s. Por qyteti Moutier, më i madhi i këtij regjioni, kishte votuar për dalje nga Berna, transmeton albinfo.ch. Ndërsa pasi që ishte mbivotuar nga pjesët tjera të regjionit, ishte detyruar të vazhdonte qëndrimin brenda kantonit të Bernës.

Qeveritë e kantoneve të prekura: e Bernës dhe ajo e Juras tash do ta ndjekin një procedurë të përbashkët për të jetësuar në praktikë ndryshimin të cilin sot e votoi populli, përcjell albinfo.ch. Marrëveshja në mes dy kantoneve do t`u prezantohet qytetarëve me të drejtë vote të të dy kantoneve  dhe në fund edhe Asamblesë Parlamentare (seancës së përbashkët të të dy dhomave të Parlamentit Zviceran). Në këtë rast nuk është i nevojshëm miratimi i popullit në nivel nacional.

Edhe dy komuna të vogla që ende janë me Kantonin e Bernës: Sorvilier dhe Belprahon do të votoijnë për ndërrimin e kantonit. Kjo është paraparë të ndodhë më 17 shtator.