Ndërron jetë Leka Zogu I

Për shkak të gjendjes së rëndë shëndetësore, përfaqësimin e tij në aktivitete të ndryshme e ka bërë prej kohësh i biri, Princi Leka

Ka ndëruar jetë në spital në moshën 72- vjeçare pretendenti për fronin mbretëror, Leka Zogu I. Pretendenti ndodhej prej disa ditësh i shtruar në spital në reanimacionin e neuro-kirurgjisë në spitalin e Tiranës.

Leka Zogu I, u shtrua me urgjencë pak kohë më parë në gjendje kritike për jetën, por pak më vonë nisi të përmirësohej. Ai prej kohësh ka pasur probleme në rrugët e frymëmarrjes dhe nga anoreksia e theksuar.

Për shkak të gjendjes së tij shëndetësore, prej një kohe të gjatë ai ka shmangur daljet publike, apo intervistat në media, ndërsa përfaqësimin e tij në aktivitete të ndryshme e ka bërë i biri, Princi Leka.

Leka Zogu I, lindi në 5 Prill të vitit 1939 në Tiranë. Është djali i Ahmet Zogut, i shpallur Mbret i Shqipërisë në ato vite. I ardhur prej dy ditësh në jetë në prill të 1939 familja mbretërore nis një jetë të re në mërgim. Ai shkeli për herë të parë në Tiranë në nëntor të 1993, me një vizitë të papritur kur u ul në aeroportin e Rinasit me një avion privat. Pretendenti i Fronit bëri një përpjekje të parë për të ringjallur dhe ushqyer idenë e monarkisë në ato vite. Ai u rikthye përfundimisht, së bashku me familjen për të jetuar në Shqipëri në qershor të vitit 2002.