Berishës i bie të fikët, në 21 vjetorin e PD-së

Kryeministri i Shqipërisë, Sali Berisha është detyruar të ndërpresë fjalimin e tij në ceremoninë e 21-vjetorit të krijimit të Partisë Demokratike, pasi ka shfaqur dobësi fizike.

Kryeministri është ndjerë keq dhe është larguar nga podiumi i ndihmuar nga shoqëruesit e tij, për shkak të një luhatjeje tensioni, e cila e ka çuar në gjysmë të fikët.

Ai ka qëndruar pak momente prapa skenës dhe më pas ka lënë Pallatin e Kongreseve i shoqëruar nga skorta e tij.

Sipas kryetares se Kuvendit, Jozefina Topalli, shefi i qeverisë kaloi një gjendje të gjysmë të fikti, për shkak të një viroze. Topalli bëri të ditur se nuk ka asgjë për t’u shqetësuar, pasi gjendja e kryeministrit ishte momentale dhe ai ndjehet më mirë.

Kurse zyra për informim e kryeministrisë së Shqipërisë, pas shtrimit për pak kohë në një spital privat të Tiranës, u raportua se gjendja shëndetësore e Berishës është stabile dhe ai ishte dërguar në shtëpi.

Pas njoftimit se kryeministri Sali Berisha pati përkeqësim të shëndetit gjatë fjalimit me rastin e 21-vjetorit të PD, ka reaguar kreu i PS, Edi Rama në faqen personale të rrjetit social, Tëitter.

“Sapo dëgjova për sëkëlldinë e Saliut në festë. Ndjej keqardhje dhe uroj sinqerisht që të mos jetë asgjë serioze për shëndetin. Të shkuara!”, shkroi kryesocialisti Rama.

Kryeministri i Kosovës, Hashim Thaçi, pasi mori lajmin për përkeqësimin e shëndetit të homologut të tij nga Shqipëria, Sali Berisha, përmes një komunikate dërguar medieve, i ka uruar shëndet atij.

“Me keqardhje e morëm lajmin për një krizë shëndetësore të Kryeministrit të Republikës së Shqipërisë, Shkelqësisë së Tij, z. Sali Berisha. Përkeqësimi ishte i ndjeshëm, pasi ndodhi në një moment solemn, me rastin e 21 vjetorit të PDSH-së, parti që luajti rol historik në themelet e demokracisë shqiptare”, ka theksuar Thaçi.